Վազգեն Մանուկյանը Նախագահի հետ հանդիպման ժամանակ կբարձրացնի պարտադիր կուտակային կենսաթոշակային համակարգի հետ կապված խնդիրները

21:03 • 11.01.14

ՀՀ հանրային խորհրդի նախագահ Վազգեն Մանուկյանը  Նախագահ Սերժ Սարգսյանի հետ հանդիպման ժամանակ կբարձրացնի պարտադիր կուտակային կենսաթոշակային համակարգի հետ կապված` հանրությանը հուզող խնդիրները և կներկայացնի առաջարկներ։ Tert.am-ի հետ զրույցում Վազգեն Մանուկյանը դժվարացավ հայտնել, թե հանդիպումը երբ տեղի կունենա։


«Դեռ չենք պայմանավորվել հանդիպման մասին, բայց մենք պարբերաբար հանդիպում ենք, և առաջին իսկ հանդիպման ժամանակ անպայման անդրադառնալու ենք այդ հարցին, որովհետև կարծում եմ` այն շատ կարևոր է հասարակության համար»,-ասաց Վազգեն Մանուկյանը։


Մեր դիտարկմանը, թե շուրջ մեկ ամիս առաջ խորհուրդը դիմել էր ՀՀ Նախագահ Սերժ Սարգսյանին և վարչապետ Տիգրան Սարգսյանին` հարցի շուրջ Ազգային ժողովի արտահերթ նիստ հրավիրելու հորդորով, արդյո՞ք որևէ պատասխան ստացել են, Վազգեն Մանուկյանը պատասխանեց. «Մեր հարաբերություններն ի պաշտոնե այնպիսին չեն, որ մենք դիմում ենք ուղարկում, պետք է պատասխան ստանանք. մենք ուղղակի առաջարկություն ենք արել»։


Հարցին, թե իր կարծիքով` ինչու՞ իրենց առաջարկությանն ընթացք չի տրվում, Վազգեն Մանուկյանը պատասխանեց` գուցե պատճառն այն է, որ մի քանի տարվա քննարկումների արդյունքում է մշակվել համակարգը, և այսօր դժվար է այն փոփոխել։
«Ես մոդելին դեմ չեմ, բայց այն կարելի էր բարելավել ու մատչելի դարձնել մեր հասարակության համար»,-ասաց նա։