Կառավարությունն առաջ հեքիաթներ էր պատմում, հիմա արդեն չի էլ պատմում. առողջապահության նախկին նախարար
Եթե Կառավարությունն առաջ զանազան հեքիաթներ էր պատմում, հիմա արդեն դրանք էլ չի պատմում, քանի որ արդեն անցել են վերընտրվելու ու վերարտադրվելու ժամանակները:
Tert.am–ի հետ զրույցում անդրադառնալով Հայաստանում ժողովրդագրական վիճակին և ծնելիությանը՝ նման գնահատական հնչեցրեց առողջապահության նախկին նախարար Արարատ Մկրտչյանը:
«Երկրում առկա է արտագաղթ և որպես դրա անմիջական հետևանք՝ ծնելիության ցուցանիշի տարեցտարի անկում, դրա հետևանքով էլ՝ տարիքա-սեռային կազմի փոփոխություն: Այսինքն՝ մեկնողները երիտասարդներն են, աշխատունակ տարիքի մարդիկ, որոնք նաև վերարտադրողական տարիքի են, և այստեղ մնում են երեխաներն ու ծերերը»,–ասաց Մկրտչյանը։
Հիշեցնենք, որ ըստ Ազգային վիճակագրական ծառայության (ԱՎԾ) հրապարակած տվյալների՝ 2013 թվականի հունվար-սեպտեմբեր ամիսներին Հայաստանի 122191 քաղաքացի հատել է սահմանային անցակետերը և չի վերադարձել: Անցած տարի չվերադարձածների թիվը կազմել էր 109 հազար 405:
Հայաստանում անվճար ծննդօգնության ներդրումը ժամանակին համարվում էր առողջապահության նախարարության լավագույն բարեփոխումներից մեկը, բայց չնայած սրան՝ վերջին չորս-հինգ տարիներին Հայաստանում ծնելիության անկում է նկատվում: Միակ բացառությունը 2009-2010 թթ. էր, երբ գրանցվել է ծնելիության համեմատաբար բարձր ցուցանիշը՝ միջինից շուրջ 3000–ով ավելի ծնունդներ: Եվ այն ժամանակ դա որակվեց որպես baby boom:
Tert.am-ի հետ զրույցում Արարատ Մկրտչյանն այս ցուցանիշը պայմանավորեց Հայաստանում հետպատերազմյան (արցախյան–խմբ.), հետերկրաշարժյան տարիների սերնդի առկայությամբ՝ ասելով. «Երկրաշարժերից, աղետներից, պատերազմներից հետո կտրուկ ավելանում է ծնելիությունը, դա ամբողջ աշխարհում է այդպես, դա պաշտպանական, կենսաբանական ռեակցիա է»
Այսինքն՝ 90-ականների սկզբին ծնված սերունդն է շատ եղել, որն էլ հասնելով վերարտադրության տարիքի՝ մեծ թվով երիտասարդ նորաստեղծ ընտանիքներ է կազմել:










