Կիևում պատանդ են վերցրել 3 ոստիկանի, մեկին՝ դանակահարել. բախումները շարունակվում են (ուղիղ միացում)
Կիևի Անկախության հրապարակում ուրբաթ երեկոյան ցուցարարները հարձակվել են երեք ոստիկանի վրա, մեկին՝ դանակահարել, հայտնում է korrespondent.net-ը՝ Ուկրաինայի ներքին գործերի նախարարությանը հղումով։
«Իրավապահներին պահել են Կիևի քաղաքային վարչակազմի շենքում։ Այժմ վիրավոր ոստիկանն ազատ է արձակվել, նա հոսպիտալացվել է ։ Եվս երկու ոստիկանի ճակատագիրն անհայտ է»,- նշվում է հաղորդագրությունում։
Հաղորդվում է, որ մայրաքաղաք Կիևի Գոլոսեևյան թաղամասում ուրբաթ երեկոյան հայտնաբերվել է ոստիկանի դի։ Ականատեսները, ըստ աղբյուրի, նկատել են դեպքի վայրից փախչող երկու անձի։
Ինչպես հայտնել են ՆԳՆ-ից, ոստիկանը եղել է 27 տարեկան։
Ինչ վերաբերում է Գրուշևսկու փողոցում դեպքերին, ապա այստեղ բախումները շարունակվում են։ Ցուցարարներն իրավապահների ուղղությամբ քարեր ու Մոլոտովյան կոկտեյլներ են նետել, իսկ «Բերկուտի» հատուկջոկատայինները լուսաձայնային նռնակներով պատասխանել։ Հաղորդվում է վիրավորների մասին։
Կիևում հունվարի 19-ից ի վեր տեղի ունեցող անկարգությունների հետևանքով տուժել են հարյուրավոր մարդիկ, որոնց թվում կան և՛ իրավապահներ, և՛ ցուցարարներ։ Հաղորդվում է նաև զոհերի մասին, որոնց թվում է հայազգի Սերգեյ Նիկոյանը։










