Նոր սերնդի անձնագիրը Հայաստանի այցեքարտն է աշխարհում՝ փաստաթուղթ, որի յուրաքանչյուր էջում արտացոլված են մեր երկրի պատմությունն ու դիմագիծը․ ՀՀ ՆԳՆ (տեսանյութ)

10:41 • 21.11.26

Կենսաչափական համակարգի ներդրմամբ Հայաստանում մեկնարկած թվայնացման նոր դարաշրջանն իրականություն է․ դիմում ներկայացրած քաղաքացիներն արդեն ստանում են նոր սերնդի կենսաչափական անձնագրերը։ Այս մասին հայտնում է ՆԳ նախարարությունը։

«Նոր կենսաչափական անձնագիրն ստացող քաղաքացիների առաջին տպավորությունները տարբեր են, բայց բոլորի խոսքում մեկ ընդհանուր շեշտադրում կա՝ նոր որակ, նոր ձևավորում և նոր հնարավորություններ։

Ոմանց գրավում է անձնագրի ժամանակակից տեսքն ու որակը, մյուսների համար կարևոր է փաստաթղթի հուսալիությունն ու անվտանգային բաղադրիչը։

Նոր սերնդի կենսաչափական անձնագիրը պարզապես նոր ձևաչափի անձնագիր չէ, այլ անվտանգության, հուսալիության և տեխնոլոգիական առաջընթացի նոր մակարդակ։ 

Անձնագրում ներդրված էլեկտրոնային չիպը պահպանում է քաղաքացու տվյալներն ու դեմքի թվային պատկերը՝ ապահովելով նույնականացման լրացուցիչ հնարավորություններ։

Իսկ բազմաշերտ պաշտպանական տարրերը բարձրացնում են դրա կեղծման անհնարինությունը։ Նոր համակարգի ներդրմամբ արդիականացվել է ոչ միայն փաստաթղթերի տրամադրման տեխնոլոգիան, այլև սպասարկման ամբողջ գործընթացը։

Այսպիսով, ծառայությունները դարձել են առավել հասանելի և ճկուն՝ քաղաքացիներին հնարավորություն տալով իրենց ժամանակացույցին հարմար ժամի ստանալ անհրաժեշտ ծառայություններն ու անցնել փաստաթղթավորման ընթացակարգերը։

Նոր կենսաչափական անձնագիրը՝ ՀՀ քաղաքացու ինքնության և պետականության միասնական խորհրդանիշն է՝ պաշտպանվածության ժամանակակից լուծումներով»,- նշվում է ՆԳ նախարարության տարածած հաղորդագրության մեջ։