Սաակաշվիլին կոչ է արել ԱՄՆ-ին և ԵՄ-ին պատժամիջոցներ սահմանել ուկրաինական իշխանությունների դեմ
Վրաստանի նախկին նախագահ Միխեիլ Սաակաշվիլին The Wall Street Journal-ի էջերից ԱՄՆ-ին և Եվրամիությանը կոչ է արել պատժամիջոցներ սահմանել Ուկրաինայում իշխանությունների ներկայացուցիչների և նրանց աջակցող օլիգարխների դեմ:
Նրա կարծիքով՝ պատժամիջոցները պետք է առնչվեն վիզաների տրամադրման արգելքին, արտասահմանյան բանկերում հաշիվների սառեցմանը: Իսկ ուկրաինական ընդդիմության առաջնորդները, մասնավորապես Վիտալի Կլիչկոն, պետք է հրավեր ստանան այցելել Վաշինգտոն և այլ արևմտյան մայրաքաղաքներ:
Մոսկվային Արևմուտքը պետք է զգուշացնի չմիջամտել Ուկրաինայի գործերին, համարում է Սաակաշվիլին: Ուկրաինայում վերջին իրադարձությունները Վրաստանի նախկին նախագահն անվանել է «XXI դարի առաջին աշխարհաքաղաքական հեղափոխություն»:










