Մարդու իրավունքների առումով իրավիճակն Ադրբեջանում միայն վատթարանում է. Human Rights Watch

14:36 • 14.05.14

Ադրբեջանը, Եվրոպայի խորհրդի նախարարների կոմիտեի նախագահությունը ստանձնելով, լրջորեն չի կատարում այդ կազմակերպության առաջ մարդու իրավունքների ոլորտում ստանձնած պարտավորությունները։ Այս մասին ասված է Human Rights Watch իրավապաշտպան կազմակերպության վերջին զեկույցում։

 

Ինչպես տեղեկացնում է haqqin.az-ը, Հարավային Կովկասի հարցերով Human Rights Watch-ի գլխավոր հետազոտող Գեորգի Գոգիան հայտարարել է, որ Եվրոպայի խորհուրդը մարդու իրավունքների ոլորտում առաջատար կազմակերպություն է, սակայն Ադրբեջանը բացահայտորեն անտեսում է դրա չափանիշները։

 

Զեկույցում նշվում է, որ ԵԽ-ն պետք է Ադրբեջանի ղեկավարությանը հստակ հասկացնի, որ անհրաժեշտ է ազատ արձակել կառավարությանը քննադատելու համար անարդարացի կերպով ազատազրկվածներին և խոր բարեփոխումներ իրականացնել մարդու իրավունքների և ժողովրդավարության ոլորտներում։

 

Զեկույցում նշված է, որ վերջին երկու տարիների ընթացքում Ադրբեջանի իշխանությունները սպառնացել կամ քրեական հետապնդում են իրականացրել առնվազն 38 քաղաքական ակտիվիստի, լրագրողի, բլոգերի հանդեպ, և նրանցից շատերն այժմ էլ կալանքի տակ են՝ մտացածին մեղադրանքներով։

 

Քրեական հետապնդումները տեղի են ունենում բազմաթիվ խախտումներով, և կասկածի տեղ չեն թողնում, որ այդ քննադատների դեմ մեղադրանքները սարքված են, և նրանց ակտիվությունն ու իշխանությունների հանդեպ քննադատությունը պատժելու նպատակ ունեն։

 

Զեկույցում նշվում է, որ 2001թ.-ի ԵԽ-ին անդամակցելով՝ Ադրբեջանը պարտավորություն է ստանձնել ազատ արձակելու քաղբանտարկյալներին և դադարեցնելու ճնշումները կառավարության քննադատների հանդեպ։

 

2013թ.-ի հունվարին ընդունված ԵԽԽՎ բանաձևը ևս Ադրբեջանի կառավարություններին կոչ է անում վերանայել կասկածելի մեղադրանքներով հարուցված քրեական գործերը։
 

Չնայած դրան՝ Human Rights Watch-ը կարծում է, որ իրավիճակն Ադրբեջանում միայն վատթարացել է։