Մհեր Սեդրակյանը կրկին իր «բարձրության» վրա է.այս անգամ նա վիրավորանքներով ու հայհոյանքներով «ճանապարհեց» Tert.am-ի լրագրողներին

Ազգային ժողովի «Հանրապետական» խմբակցության անդամ Մհեր Սեդրակյանը այսօր Կառավարության ծրագրի հաստատումից հետո կրկին իրեն հոգեհարազատ ամպլուայում էր. պատգամավորն իրեն հարց ուղղելու համար մոտեցած Tert.am–ի լրագրողներին որոշեց «ճանապարհել» վիրավորանքներով ու հայհոյանքով: Քանի որ սույն պատգամավորի լեզվական բառապաշարը ակնհայտորեն չի տեղավորվում բարոյական, էթիկական ու նույնիսկ՝ մարդկային և ոչ մի հարթությունում, առայժմ   ձեռնպահ ենք մնում Tert.am-ի լրագրողների հասցեին Մհեր Սեդրակյանի բերանին ու մտքին եկած բառերը վերարտադրելուց և ձայնագրությունը հրապարակելուց:

Հիշեցնենք, որ սա առաջին դեպքը չէ, երբ հայտնի մականունով պատգամավորը հրապարակավ վիրավորում է լրատվամիջոցի աշխատակցին՝ իրեն հարիր բառապաշարով:
 

Ա1+-ի լրագրողի հետ տեղի ունեցած սկանդալային միջադեպից օրեր անց սույն պատգամավորը հայտարարություն էր տարածել, որտեղ ափսոսանքի խոսքեր էր ասել նյարդային պահին հնչած խոսքերի համար:

Tert.am-ի խմբագրության տրամադրության տակ է միջադեպի ամբողջական ձայնագրությունը: Հուսով ենք, որ պատգամավորը, ով այսօր շատ սառը ջուր էր խմել, (ինչի մասին ասաց չստացված հարցազրույցի սկզբում) կվերագնահատի իր պահվածքը Ազգային ժողովում և ներողություն կխնդրի Tert.am-ի լրագրողներից:

Հակառակ պարագայում Tert.am-ի խմբագրությունը օրենքով վերապահված բոլոր միջոցներով հետամուտ կլինի իր աշխատակիցների արժանապատվության վերականգնմանը և միջադեպի քննությանը: