Իրանում դատարանն Instagram-ն արգելափակելու մասին որոշում է կայացրել

Իրանում դատարանն Instagram-ն արգելափակելու մասին որոշում է կայացրել։ Որոշումը կայացվել է անհատական հայցի հիման վրա, այլ մանրամասներ չեն հաղորդվում, հայտնում է Интерфакс-ը՝ հղում անելով Mehr News գործակալությանը։

Դատարանի որոշումը փոխանցվել է Իրանի կապի նախարարությանը։ Ներկայում, սակայն, իրանցի օգտատերերի համար հավելվածը դեռևս հասանելի է։

Հատկանշական է, որ Instagram-ում հաշիվներ ունեն երկրի նախագահ Հասան Ռոհանին և երկրի գերագույն հոգևոր առաջնորդ այաթոլլա Ալի Խամենեին։
 

Twitter, Facebook սոցկայքերը, ինչպես նաև YouTube կայքը նախկինում նույնպես եղել են արգելափակված, սակայն օգտատերերը կարողանում են միջոցներ գտնել արգելքը շրջանցելու համար։