Հալեպում հայեր են վիրավորվել

08:43 • 21.07.14

Հանգստյան օրերին Հալեպի հայաշատ թաղամասերում դարձյալ պայթյուններ են լսվել:

Ինչպես տեղեկացնում է Հալեպի «Գանձասար» շաբաթաթերթի ֆեյսբուքյան էջը, զինյալ ահաբեկչական խմբավորումների կողմից արձակված հրասանդի արկի պայթյունի հետևանքով Սուլեյմանիե թաղամասում վիրավորվել են Ավետիս և Էլիզ Քյուրքճյանները, իսկ պատահական փամփուշտից վիրավորվել է Լարա Սնունին:


Վիրավորների վիճակը գնահատվում է բավարար:

Հալեպում կան թաղամասեր, որոնք ավելի քան 50 օր ջրազրկված են, սակայն ընդհանուր առմամբ ջրամատակարարման հարցը համեմատաբար կարգավորվել է, և էլեկտրական սարքերի միջոցով հնարավոր է լինում որոշակի ժամերի տուն ջուր հասցնելը։


Այնուհանդերձ, մարդիկ շարունակում են տուն տանել դպրոցների, եկեղեցիների և մզկիթների բակերում փորված հորերի ջուրը, որը, սակայն, խմելու համար պիտանի չէ և օգտագործվում է բացառապես կենցաղային նպատակներով: