Դոնեցկի օդանավակայանի մոտ մարտերը վերսկսվել են

12:09 • 21.07.14

Դոնեցկում օդանավակայանի համար մարտերն այսօր առավոտյան վերսկսվել են, տեղեկացնում է korrespondent.net-ը՝ Դոնեցկի քաղխորհրդի մամուլի ծառայությանը հղումով:

 

«Առավոտյան 9:00-ի դրությամբ շատ շրջաններում օդանավակայանի կողմից լսվում են ծանր տեխնիկայի կիրառման ձայներ»,- ասել են մամուլի ծառայությունից՝ նշելով, որ Դոնեցկում գիշերը համեմատաբար հանդարտ է եղել:

Քաղաքի կոմունալ ծառայություններն աշխատում են: Առավոտյան որոշ շրջաններում էլեկտրաէներգիայի խափանում է տեղի ունեցել, և մասնագետներն այժմ փորձում են վերականգնել այն:

 

Գերատեսչությունից նաև նշել են, որ աշխատանքի են դուրս եկել 85 տրամվայ, 112 տրոլեյբուս, 78 ավտոբուս, ինչպես նաև 652 երթուղային:

 

«Պայմանավորված այն հանգամանքով, որ Դոնեցկի օդանավակայանի շրջանը վտանգավոր է, փոփոխվել են որոշ երթուղիների ուղեգծերը»,-ասված է Դոնեցկի մամուլի ծառայության հաղորդագրության մեջ:
 

Հիշեցնենք, որ հուլիսի 17-ին Դոնեցկի մարզում կործանվել էր մալայզիական օդանավը, որում գտնվող 298 մարդիկ զոհվել են։  ԱՄՆ-ն կոչ էր արել դադարեցնել մարտերը շրջանում՝ հետաքննության համար։