Հնդկաստանի իշխանությունները վարձել են 40 մարդու, ովքեր կապիկների կոստյումով կքշեն մակականերին խորհրդարանի տարածքից (տեսանյութ)
Հնդկաստանի իշխանությունները վարձել են 40 մարդու, ովքեր կապիկների կոստյումով կվախեցնեն մակականերին՝ քշելով նրանց երկրի խորհրդարանի՝ Նյու Դելիում գտնվող շենքի տարածքից: Ինչպես հաղորդում է ria.ru-ն՝ BBC News-ին հղումով, ներկայում հազարավոր մակականեր զբոսնում են Դելիի փողոցներում, ներառյալ Նյու Դելիի շրջանը, որտեղ տեղակայված է երկրի խորհրդարանը:
Նրանք խախտում են քաղաքացիների անդորրը, գրոհում այգիները, աշխատանքային գրասենյակները, անգամ հարձակվում են մարդկանց վրա՝ նրանցից խլելով սնունդը: Այս պատճառով վարձվող աշխատակիցները պետք է լանգուր տեսակի կապիկի ձայներ արձակեն (կապիկի խոշոր տեսակ), որպեսզի վախեցնեն մակականերին:
Դելիի փողոցներում հազարավոր կապիկների խրախճանքը դարձել է մեգապոլիսի քաղաքացիների լրջագույն խնդիրներից մեկը: Արդեն արձանագրվել են դեպքեր, երբ կապիկներն անկարգություններ են ստեղծել մետրոյի վագոններում, ներխուժել խորհրդարանի շենք, նաև՝ վարչապետի և պաշտպանության նախարարի գրասենյակներ:
Հնդկաստանում կապիկները սուրբ կենդան են համարվում, ուստի արգելված է նրանց սպանելը: Տեղացիները նույնիսկ կերակրում են նրանց, ուստի նրանց թիվը տարեցտարի ավելանում է:










