Մեքսիկայում երիտասարդը պատահաբար ինքնասպան է եղել զենքով «սելֆի» անելիս
Մեքսիկայում 21-ամյա երիտասարդն ատրճանակով «սելֆի» անելիս (ինքնալուսանկար) ինքնասպան է եղել, հայտնում է vesti.ru-ն: Դեպքը տեղի է ունեցել Մեխիկոյի հյուսիսում:
Ինչպես հայտնում է Daily Mail-ը, մահից որոշ ժամանակ առաջ Օսկար Օտերո Ագիլարն ընկերների հետ ալկոհոլ է օգտագործել: Հավանաբար այդ ժամանակ նրանց մոտ զենքով լուսանկարվելու և այն Facebook ներբեռնելու ցանկություն է առաջացել: Շուտով տեղի իրավապահ մարմինները նրան գտել են գլխի հատվածում հրազենային վնասվածքով:
Մահացածի հարևանը հայտնել է, որ լսել է կրակոցի ձայն ու դրան հետևող ճիչ, այնուհետ ոստիկանություն է կանչել: Այդ ժամանակ նա դեռ ողջ է եղել, սակայն նրա կյանքը փրկել չի հաջողվել: Ոստիկանությունից հայտնել են, որ դեպքը որակվել է որպես դժբախտ պատահար: Տղայի ընկերներից մեկին ձերբակալել են, մյուսը փախուստի է դիմել:
Նմանատիպ դեպք տեղի է ունեցել Իսպանիայում, երբ երիտասարդը փորձել է լուսանկարվել գնացքի տանիքին: Նա մահացել է, իսկ նրա ընկերը ծանր վիճակում տեղափոխվել է հիվանդանոց:
Եվս մեկ լուսանկարվելու սիրահար փորձել է նկարվել ընթացող գնացքի ֆոնին՝ դրան շատ մոտ հեռավորության վրա, սակայն անսպասելիորեն գնացքի մեքենավարը հարվածել է նրան ոտքով: Հոլովակը հավաքել է ավելի քան 35 միլիոն դիտում՝ ունենալով ընդամենը 10 վայրկյան տևողություն:













