Հայ, քուրդ, հույն, թուրք լինելուց առաջ նրանք Թուրքիայի քաղաքացիներ են, և ես 77 մլն բնակչի նախագահն եմ. Էրդողան

09:19 • 11.08.14

Թուրքիայի իշխող «Արդարություն և զարգացում» կուսակցության առաջնորդ, երեկ, ըստ նախնական հաշվարկների, նախագահ ընտրված Ռեջեփ Թայիփ Էրդողանն ընտրության ավարտից հետո ելույթ է ունեցել կուսակցության պատշգամբից, գրում է «Cumhuriyet»-ը։

 

«Թուրք, քուրդ, հայ, հույն լինելուց առաջ նրանք Թուրքիայի քաղաքացիներ են: Մուսուլման, քրիստոնյա, եզդի լինելուց առաջ նրանք Թուրքիայի քաղաքացիներ են: Ալևի կամ սուննի լինելուց առաջ թուրքիացիներ են»,- ասել է նա:

 

Ոչ պաշտոնական տվյալներով՝ Թուրքիայի 12-րդ նախագահ ընտրված վարչապետ Էրդողանը հայտարարել է, թե ինքը Թուրքիայում բնակվող 77 մլն մարդու նախագահն է:

 

Ի դեպ, այս անգամ, ի տարբերություն նախորդ հակահայկական ելույթի, նա հայ և հույն ժողովուրդներին հիշատակելիս ներողություն չի խնդրել:

 

«Թուրքիայի նախագահական ընտրություններում արտահայտվեց թուրք ժողովրդի կամքը»,- հայտարարել է Էրդողանն ու շնորհակալություն հայտնել իրեն աջակցողներին:

 

Ըստ նախնական տվյալների՝ Էրդողանը ստացել է ձայների 56.56%-ը: Ընդդիմության միասնական թեկնածու Էքմելեդդին Իհսանօղլուն ստացել է 37.48, իսկ քուրդ Սալահադդին Դեմիրթաշը՝ 8.96%:

 

Ի դեպ, թուրք լրագրողների ուշադրությունը գրավել է այն հանգամանքը, որ Էրդողանը նախագահ դառնալուց հետո իր առաջին ելույթում ոչ մի անգամ չի արտաբերել Թուրքիայի Հանրապետության հիմնադիր Աթաթուրքի անունը: