Արևմտյան Աֆրիկայում Էբոլա վիրուսից մահացածների թիվը հասել է 1013-ի. ԱՀԿ

10:15 • 12.08.14

Արևմտյան Աֆրիկայում մահացու Էբոլա վիրուսից մահացածների թիվը հասել է 1013-ի, այդ մասին հայտնել է Առողջապահության համաշխարհային կազմակերպությունը (ԱՀԿ), փոխանցում է Взгляд-ը։

 

Համաձայն վերջին տվյալների՝ մահացու վիրուսով վարակվածների թիվը հասել է 1.848-ի։

 

ԱՄՆ նախագահ Բարաք Օբաման և ԱՄՆ առողջապահության նախարարության սննդամթերքի և դեղորայքի վերահսկման վարչությունը հավանության են արժանացրել Լիբերիայի կառավարության դիմումը և այդ երկիր կուղարկեն փորձնական շիճուկ։ Այն Աֆրիկա կհասնի արդեն այս շաբաթ։

 

ԱՀԿ-ն նույնպես մտադիր է դեղորայք մատակարարել Լիբերիա։

 

Էբոլա համաճարակը սկսվել է ձմռանը, Արևմտյան Աֆրիկայում՝ Լիբերիայում, Սիերա Լեոնեում և Գվինեայում։

 

Էբոլա հեմոռագիկ տենդը համանուն վիրուսով վարակման արդյունքում առաջացող հիվանդություն է: Այն առաջին անգամ ախտորոշվել է 1976թ.-ին՝Աֆրիկայում:

Վարակի վաղ նախանշաններն են տենդը, գլխացավը, հոդացավը, մկանների և կոկորդի ցավը, փորլուծությունը, փսխումը և ստամոքսի ցավը: Որոշ դեպքերում էլ մաշկային ցան, աչքերի կարմրություն, զկռտոց, ինչպես նաև ներքին ու արտաքին արյունահոսություն կարող է առաջանալ:


Էբոլա վիրուսի կրողը շիմպանզեն, գորիլան, անտառային անտիլոպն ու մակական են համարվում: Յուրաքանչյուր համաճարակի բռնկման դեպքում այն վերոհիշյալ կենդանիներից որևէ մեկից է մարդու օրգանիզմ անցնում, այնուհետ արյան, թքի, լորձի և այլ արտազատումների միջոցով մարդուց մարդ փոխանցվում: Հիվանդության նկատմամբ առավել խոցելի երկրներում հեմոռագիկ տենդը կարող է նաև հիվանդներից բուժաշխատողներին անցնել, եթե վերջիններս պաշտպանիչ հագուստ և դիմակ չեն կրում: Բացի այդ, վարակված ասեղի հետագա օգտագործումը ևս կարող է հիվանդության տարածման միջոց դառնալ: