Շերլոք Հոլմս՝ մարդ, ով երբեք չի ապրել և չի մահանա. Լոնդոնում հայտնի խուզարկուին նվիրված խոշոր ցուցահանդես կբացվի (նկարներ)

Լոնդոնի թանգարանում այսօր կբացվի բոլոր ժամանակների և բոլոր ժողովուրդների ամենահայտնի խուզարկու Շերլոք Հոլմսին նվիրված խոշոր ցուցադրություն, գրում է РИА Новости-ն։

«Մեր յուրաքանչյուր հյուր անցնելու է գրքերի պահարանի միջով։ Այդպիսով՝ նա կհայտնվի այլ, կիսով չափ հորինված, կիսով չափ իրական տարածքում»,- ասել է ցուցադրության կազմակերպիչներից մեկը։

Ցուցահանդեսի մուտքն իսկապես ձևավորված է գրադարակների տեսքով՝ հնագույն գրքերով։ Անցնելով այդ պահարանի միջով՝ հանդիսատեսը հայտնվում է էկրաններով սրահում, որտեղ ցուցադրվում են Շերլոքի տարբեր կինոհերոսները, այդ թվում՝ Բենեդիկտ Քամբերբեթչը հայտնի սերիալից և Ռոբերտ Դաունի կրտսերը։

Թանգարանի այցելուները հնարավորություն կունենան լսել հենց Արթուր Կոնան Դոյլի ձայնը. հարցազրույցներում հեղինակը պատմում է հարյուրավոր նամակների մասին, որոնք ուղղված են իր հերոսին։ «Ես ստանում եմ նամակներ, որոնցում խնդրում են Հոլմսի ինքնագիրը։ Ես ստանում եմ նամակներ նաև նրա ընկերոջ՝ Վաթսոնի համար, և նույնիսկ նամակներ կանանցից, որոնք երազում են աշխատել Հոլմսի տանը»,- ժպիտով պատմում է գրողը։

«Շերլոք Հոլմս. մարդ, ով երբեք չի ապրել և չի մահանա» անվանումով ցուցադրությունը բաց կլինի մինչ 2015թ. ապրիլի 12-ը։