Հայտնաբերվել է Օսկար Ուայլդի խորհրդավոր ընկերոջ լուսանկարը (լուսանկարներ)

Բրիտանական Ռեդինգ քաղաքի բանտի արխիվներում, որտեղ կալանավորված է եղել գրող Օսկար Ուայլդը, գտնվել է աշխատավոր Հենրի Բուշնելի լուսանկարը, որի հանդեպ, որոշ տվյալներով, գրողը յուրահատուկ հետաքրքրություն է ցուցաբերել, գրում է Корреспондент-ը։

Բուշնելի լուսանկարը հայտնաբերել է պրոֆեսոր Փիթեր Սթոնլին Ռեդինգի համալսարանից, ով ուսումնասիրել է այդ բանտում միաժամանակ Ուայլդի հետ հայտնված մարդկանց մասին տվյալները։

Սթոնլիի խոսքով՝ դրամատուրգը տարված է եղել Բուշնելով, սակայն նրանց հարաբերությունների մանրամասները հայտնի չեն։

1895-ին Օսկար Ուայլդը դատապարտվել է 2 տարվա ազատազրկման միասեռականության համար։ Նամակներից մեկում, որոնք Ուայլդը գրել է բանտում, նա հիշատակում է «մուգ աչքերով տղայի մասին», ենթադրաբար՝ Բուշնելի, ով 1892-1911թթ. ընթացքում ավելի քան 20 անգամ հայտնվել է բանտում գողության համար, պատմել է պրոֆեսորը։

Դատապարտյալներից շատերին այդ ժամանակ չեն լուսանկարել, սակայն հանցագործ Բուշնելին լուսանկարել են։ Ռեդինգի բանտում, որը վերջերս դադարեցրել է իր գործունեությունը, պահպանվել է նրա 7 լուսանկար։

«Մենք չգիտենք Ուայլդի և Բուշնելի միջև հարաբերությունների մանրամասները, սակայն հայտնի է, որ Վիկտորյա թագուհու ժամանակաշրջանում դատապարտյալներին թույլ չեն տվել նույնիսկ խոսել միմյանց հետ բանտում, առավել ևս ուտել կամ աշխատել միասին կամ անձնական հարաբերություններ ունենալ»,- հայտարարել է պրոֆեսոր Սթոնլին՝ Ուայլդի ծննդյան 160-ամյակին նվիրված միջոցառման ժամանակ։

Նրա խոսքով՝ բանտից դուրս գալուց հետո Ուայլդը Բուշնելին է փոխանցել որոշակի գումար, սակայն հետագա հանդիպումները 2 տղամարդկանց միջև քիչ հավանական են։