Օդանավի նոր նստատեղերի դիզայնը թույլ կտա ավիաուղևորներին պառկել (լուսանկարներ)

Օդանավի նոր նստատեղերի դիզայնը թույլ կտա ավիաուղևորներին պառկել և ձերբազատվել ճանապարհորդելու անհարմարություններից, գրում է Daily Mail-ը։

Հոնկոնգում բնակվող մրցանակակիր դիզայներ Ջեյմս Լին ստեղծել է նոր նստատեղի դիզայն, որից կկարողանան օգտվել ոչ միայն բիզնես, այլև պրեմիում էկոնոմ կարգի ուղևորները։

Նստատեղը ստացել է «Butterfly» անվանումը, որն անգլերենից թարգմանաբար նշանակում է «թիթեռ»։ Այն վերջերս արժանացել է IATA-ի 2014 Passenger Innovation Awards նորարարության մրցանակին։

Նստատեղը հնարավոր է «բացել» և դարձնել հասարակ մահճակալ։ Էկոնոմ կարգում երկու ուղևորներին միմյանցից բաժանելու են ձեռքի հենակները, որոնք նպատակ ունեն անձնական տարածք տրամադրել օդանավի նեղ սրահում և նվազեցնել ֆիզիկական անհարմարությունը։

Դիզայներ Լին ասել է, որ ուղևորների հարմարավետությունը և նստատեղերի բաշխվածությունը հնարավորություն կտան հաշվարկել և խնայողաբար օգտագործել օդանավի ռեսուրսները, ինչը նաև կարող է նվազեցնել տոմսերի գները։

Ամբողջ նստատեղը 195.6 սմ է։ Մասնագետները հաշվարկել են, որ այս նստատեղերի օգտագործումից 3.3 տոկոս եկամուտի բարձրացում է սպասվում։