«Հոլիվուդի ամենայուրահատուկ դերասանը»՝ Մեթյու Մքքոնախին, նշում է 45-ամյակը (լուսանկարներ)

Հոլիվուդյան դերասան Մեթյու Մքքոնախին նոյեմբերի 4-ին նշում է ծննդյան 45-ամյակը։ Կարիերայի սկզբում հանդես գալով հիմնականում կատակերգության ժանրում՝ ժամանակի ընթացքում Մքքոնախին անցում է կատարել դեպի խոշոր դրամատիկ դերեր, գրում է РИА Новости-ն։

Դերասանական կարիերան նա սկսել է 1991-ին՝ հայտնվելով գովազդային հոլովակներում։ Երկու տարի անց Մեթյուն դեր է ստացել Ռիչարդ Լինքլեյթերի Dazed And Confused ֆիլմում։

2014թ. ապրիլին Մքքոնախին ճանաչվել է 100 ամենաազդեցիկ մարդկանցից մեկն աշխարհում՝ ըստ Time ամսագրի։ Նրա մասին ելույթն ամսագրի համար գրել է ռեժիսոր Լինքլեյթերը՝ վերնագրելով այն «Ամենայուրահատուկ դերասանը Հոլիվուդում»։

Մեթյուն ամուսնացած է բրազիլացի մոդել Կամիլա Ալվեսի հետ, նրանք ունեն 3 երեխա։

«Գնորդների դալասյան ակումբը» դրամայում կատարած դերի համար նա արժանացել է բազմաթիվ մրցանակների, այդ թվում՝ «Ոսկե գլոբուսի», ԱՄՆ կինոդերասանների գիլդիայի մրցանակին և առաջին «Օսկարին»։