«Անիծված» ժամացույցի տերը մահացել է Sotheby's-ում դրա ռեկորդային գնով վաճառքից 48 ժամ անց (լուսանկար)

Անտիկ ժամացույցի, որը «անիծված» էր համարվում, նախկին տերը մահացել է ժամացույցի վաճառքից օրեր առաջ: Ինչպես հայտնում է Daily Mail-ը` Henry Graves Supercomplication անվանումը ժամացույցն ստացել էր ամերիկացի գործարարի պատվին, ով պատվիրել էր այն: 15 մլն ֆունտ ստերլինգով վաճառված ժամացույցի առաջին տերը ատում էր այն` ասելով, որ այն իրեն անհաջողությունից բացի ոչինչ չի տվել:

Արտասովոր միջադեպեր են տեղի ունեցել այս շաբաթ, երբ պարզվել է, որ 80-ամյա պատմություն ունեցող ժամացույցի վերջին տերը` Քաթարի շեյխ Սաուդ բին Մուհամմեդ ալ-Թանին, մահացել էր Sotheby's-ում ժամացույցի ռեկորդային գնով վաճառքից օրեր առաջ:

Նյույորքյան բանկի կառավարիչ Հենրի Գրեյվսը 1925-ին Patek Philippe շվեյցարական ժամագործ ընկերությանը պատվիրել է պատրաստել ժամացույցը: Մասնագետները 3 տարի անցկացրել են ուսումնասիրությունների և ևս 5 տարի` այն պատրաստելու համար: Ժամացույցը պատրաստ է եղել 1933-ին:

Երկկողմանի ժամացույցը 24 բարդություն ունի, որոնք ցույց են տալիս 24 տարբեր ֆունկցիա` ժամը, րոպեն ու վայրկյանը ցույց տալուց զատ: Դրանցից մեկը ցույց է տալիս Լուսնի փուլերը, մյուսները` արևամուտի ու արևածագի ժամանակը Նյու Յորքում: Այն նաև կարող է ցույց տալ աստղերի դիրքն ու ձևը: