Facebook-ը նոր կայք է ստեղծում գործնական շփման համար

Facebook սոցկայքն աշխատում է նոր՝ Facebook at Work նախագծի վրա, որը նախատեսված է բիզնես հարցերի շուրջ ընկերությունների աշխատակիցների շփման համար, գրում է ՏԱՍՍ գործակալությունը՝ The Financial Times պարբերականին հղումով։

Պարբերականի տվյալներով՝ Facebook-ը ցանկանում է ստեղծել LinkedIn և Google Drive ծառայությունների մրցակցին և հնարավորություն տալ ընկերությունների աշխատակիցներին շփվել միմյանց հետ, փաստաթղթեր փոխանակել, ինչպես նաև բիզնես-ծանոթություններ հաստատել։

Նոր կայքն իր դիզայնով նման կլինի Facebook-ին, կունենա լրահոս և խմբերում շփվելու հնարավորություն։ Սակայն անհասանելի կլինեն լուսանկարները, տեսանյութերը և աշխատանքին չվերաբերող տեղեկությունը։

Facebook ընկերության մամուլի ծառայությունում հրաժարվել են մեկնաբանություններից։