Բրիտանիայում մարդու գլխուղեղում 1սմ-անոց կենդանի երիզորդ են հայտնաբերել (լուսանկարներ)

Քեմբրիջում գտնվող Addenbrooke հիվանդանոցում տղամարդու գլխուղեղում բժիշկները կենդանի մեկ սանտիմետրանոց երիզորդ են հայտնաբերել, որը մի քանի ամիս շարունակ շարժվել է՝ աջուձախ անելով, գրում է Daily Mail-ը։

Սա բրիտանական բժշկության մեջ առաջին անգամն է, քանի որ որդի այդ տեսակը Բրիտանիայում չկա։

Նշվում է, որ սկսած 1953-ից՝ համաշխարհային մակարդակով նման դեպքեր հանդիպել են ընդամենը 300 անգամ։
Նշվում է, որ որդը տղամարդու օրգանիզմ է ներթափանցել ճամփորդելու ժամանակ։

Երիզորդը, գլխուղեղում գտնվելով, բորբոքում է առաջացնում՝ ուղեկցվելով ցնցումներով, հիշողության կորստով և տարբեր աստիճանի գլխացավերով։

Երիզորդի ավելի ագրեսիվ տեսակի դեպքում այն կարող է ձվադրել գլխուղեղում։ Երիզորդի բժշկական անվանումը spirometra erinaceieuropaei է։

Ռենտգեն անելուց հետո բժիշկները հակաբիոտիկներ են նշանակել պարազիտին սպանելու համար, սակայն պարզվել է, որ այն դիմացկուն է դեղանյութերի նկատմամբ։ Այդ ժամանակ որոշվել է այն հեռացնել վիրահատական ճանապարհով։

Բժիշկները հույս ունեն, որ իրենց կողմից գրանցված բժշկական տեղեկությունները և նշումները կարող են օգտակար լինել հետագայում նման դեպքերի բախվող բժիշկներին։