Դարվինի մրցանակի հետազոտությունը վկայում է՝ տղամարդիկ ավելի հիմար են կանանցից

«Դարվինի մրցանակը. հիմար վարքագծում սեռերի տարբերությունը» անվանումով նոր հետազոտությունում նշվում է, որ տղամարդիկ կանանցից հիմար են։

Գիտնականներն ուսումնասիրել են Դարվինի մրցանակի՝ վերջին 20 տարիների (1995-2014) դափնեկիրների մասին տվյալները և պարզել, որ գրեթե 90% այդ մրցանակը հանձնվել է տղամարդկանց։ Այդ եզրակացությունները փորձագետները հրապարակել են British Medical Journal-ում, փոխանցում է Газета-ն։

Դարվինի մրցանակը յուրաքանչյուր տարի հանձնում են այն մարդկանց, ովքեր առավել հիմար ձևով են մահացել և, այդպիսով, զրկել են իրենց՝ մարդկության գենոֆոնդում ներդրում անելու հնարավորությունից։ Մրցանակը ստանալու պարտադիր պայման է անմիջական ժառանգների բացակայությունը։

Հետազոտության հեղինակների խոսքով՝ «հիմար» անվանվում է անիմաստ ռիսկը, երբ ձեռնարկված քայլերի դրական ձգտումը կամ չնչին է, կամ ընդհանրապես չկա, իսկ արդյունքը բացասական է կամ ճակատագրական։

Փորձագետները գրում են նաև «տղամարդկանց հիմարության տեսության» մասին և նշում, որ մինչ օրս չի անցկացվել հիմար վարքագծի դրսևորման հարցում սեռերի տարբերության համակարգված վերլուծություն։

Գիտնականներն ուսումնասիրել են Դարվինի մրցանակի 318 դեպք, որոնցից 282-ը (88,7%) շնորհվել է տղամարդկանց և ընդամենը 36-ը՝ կանանց։