Չինաստանում նոր սերնդի «խելացի» հեծանիվ են ստեղծում

Տարատեսակ գործառույթներով համալրված «խելացի» սարքերը գնալով ավելի մեծ տարածում են գտնում ժամանակակից աշխարհում` թեթևացնելով մարդկանց առօրյա հոգսերը:

Բազմաթիվ «խելացի» սարքերի շարքը շուտով համալրելու է DuBike  հեծանիվը, որի ստեղծման աշխատանքը հանձն են առել չինացի մասնագետները:  Նրանք անցած շաբաթ հայտարարել են, որ Bluetooth կապով, ներկառուցված GPS համակարգով ու տարբեր ազդակներով համալրված  հեծանիվը պատրաստման փուլում է:

Ինչպես նշում է businessinsider.com-ը, նոր սերնդի հեծանիվը կարողանալու է ճիշտ ուղղություն ցույց տալ վարորդին, ինչպես նաև գողերից պաշտպանվելու հուսալի համակարգ է ունենալու: Բացի այդ, այն կկարողանա չափել մարդու սրտի աշխատանքն ու հաշվել կալորիաների ընդհանուր քանակը, որոնք նա այրել է հեծանիվը վարելու ընթացքում:

Աղբյուրը մանրամասնում է, որ հեծանվի ազդակներն ու էլեկտրոնային մյուս մասերն աշխատում են կինետիկ էներգիայի միջոցով: Այլ կերպ ասած՝ մինչ մարդը շարժում է հեծանվի ոտնակները, հավաքված էներգիան օգնում է ազդակներին կատարել իրենց աշխատանքը:

Ինչ վերաբերում է հեծանվի գնին ու վաճառքի հանվելու ժամկետին, ապա դեռևս ոչինչ հայտնի չէ: