«Նորմանդական քառյակի» առաջնորդները վերադարձել են բանակցությունների

11:47 • 12.02.15

Մինսկում «նորմանդական քառյակի»՝ Ռուսաստանի, Ուկրաինայի, Գերմանիայի և Ֆրանսիայի առաջնորդների բանակցությունները շարունակվում են, հաղորդում է interfax.ru-ն՝ վկայակոչելով ուկրաինական պատվիրակության աղբյուրներին:

 

Ավելի վաղ լրագրողները տեսել են, թե ինչպես է բանակցությունների սենյակից դուրս եկել սկզբից Ուկրաինայի նախագահ Պյոտր Պորոշենկոն, այնուհետ ՌԴ նախագահ Վլադիմիր Պուտինը:

 

Աղբյուրի խոսքով՝ նախագահները վերադարձել են բանակցություններին: Նա նշել է, որ Պորոշենկոն, մասնավորապես, դուրս է եկել հեռախոսով զրուցելու:

 

Բանակցությունների շարունակվելու մասին ria.ru-ին է հայտնել նաև Ուկրաինայի արտգործնախարար Պավել Կլիմկինը:

 

«Մենք շարունակում ենք աշխատել, մենք անդադար աշխատում ենք բոլոր հնարավոր ձևաչափերով»,- ասել է Կլիմկինը:

 

Ուկրաինայի նախագահ Պյոտր Պորոշենկոն հայտարարել է Մինսկում ընթացող բանակցություններին Ռուսաստանի «անընդունելի» պայմանների մասին, հաղորդում է Agence France-Presse գործակալությունը:

 

Պորոշենկոն նաև հայտարարել է, որ բանակցություններից «դեռ ոչ մի լավ նորություն» չկա:
«Ցավոք, լավ նորություններ դեռ չկան: Այս պահին ընդհանրապես ոչ մի նորություն չկա: Բայց հույս միշտ կա»,- ասել է նա France-Presse գործակալությանը:

 

Ավելի վաղ հաղորդվել էր, որ Մինսկում 14 ժամ տևած «նորմանդական քառյակի» առաջնորդների բանակցություններն ավարտվել են, և նախատեսվում է բանակցությունների ընթացքում համաձայնեցված փաստաթուղթը ներկայացնել Ուկրաինայի կոնֆլիկտի հարցով կոնտակտային խմբին: