Հայաստանի լեռներում սկսվել են ՌԴ հետախույզների տակտիկական վարժանքները
Հայաստանի «Փամբակ» լեռնային ուսումնավարժական համալիրում սկսվել են Ռուսաստանի Հարավային ռազմական շրջանի ռուսական ռազմաբազայի հետախուզական ստորաբաժանումների զինծառայողների տակտիկական զորավարժությունները: Այդ մասին հայտնում է interfax.ru-ն՝ հղում անելով Հարավային ռազմական շրջանի մամուլի ծառայության հաղորդագրությանը:
«Զորավարժություններին ներգրավվել է ավելի քան 300 զինծառայող: Զորավարժություններն անց են կացվում բարձրլեռնային շրջաններում՝ ծովի մակարդակից ավելի քան 2 հազար մետր բարձրության վրա»,- ասել են մամուլի ծառայությունում:
Ինչպես հաղորդվում է, հետախույզները պետք է սովորեն ողջ մնալ տարբեր բնական և կլիմայական պայմաններում:
Մարտի 10-ին հայտնի էր դարձել, որ Հայաստանում ռուսական ռազմաբազայում սկսվել են ինժեներային զորքերի ստորաբաժանումների դաշտային վարժանքները:










