Կոմիտասի անվան լարային քառյակը համերգով հանդես է եկել UWC Դիլիջան քոլեջում

UWC Դիլիջան քոլեջում ապրիլի 7-ի երեկոյան համերգով հանդես է եկել Կոմիտասի անվան լարային քառյակը՝ շարունակելով քոլեջում մեկնարկած համերգների շարքը, որը կազմակերպել են «Հայաստանի զարգացման նախաձեռնություններ» (IDeA) հիմնադրամն ու UWC Դիլիջան քոլեջը:

Այս անգամ ևս համերգն ունկնդրելու էին եկել ոչ միայն քոլեջի ուսանողներն ու դասախոսական կազմը, այլև Դիլիջան քաղաքի ուսումնակրթական, համայնքային այլ հաստատությունների ներկայացուցիչներ, համայնքի երիտասարդ բնակիչներ:

Քառյակը ներկայացրել է ինչպես Կոմիտասի, այնպես էլ հայ  և աշխարհահռչակ այլ կոմպոզիտորների գործերը՝ ունկնդիրներին դասական երաժշտության երեկո պարգևելով: Ելույթներն ուղեկցվում էին երաժշտագետ Նոնա Ոսկանյանի մեկնաբանություններով:

«UWC Դիլիջան քոլեջում համերգների այս շարքի ընթացքում մենք փորձեցինք հնարավորինս տարբեր ժանրեր ներկայացնել՝ ջազ, էթնիկ և ժամանակակից երաժշտություն,  իսկ այսօր՝ դասական: Մեր այս նախաձեռնությունը նպատակ ուներ ցույց տալ, որ Դիլիջանը նույնպես մշակութային միջոցառումների անցկացման հետաքրքիր վայր կարող է լինել և դրա համար մեծ ներուժ ունի»,- ասել է IDeA հիմնադրամի տնօրենի տեղակալ Սերգեյ Թանթուշյանը:

«Մենք ուրախ էինք հյուրընկալել հայ հայտնի կատարողների, այս երեկո՝ Կոմիտասի անվան լարային քառյակին և նրանց կատարմամբ ունկնդրել ինչպես ազգային, հատկապես՝ Կոմիտասի  երաժշտությունը, այնպես էլ արևմտյան դասական երաժշտություն: Հուսով ենք, որ ապագայում ևս համերգների շարք կունենանք, որը կնպաստի  քաղաքի մշակութային կյանքի ակտիվացմանը, և հնարավորություն կընձեռի, որ մարդիկ այցելեն քոլեջ՝ երաժշտություն վայելելու»,- նշել է դպրոցի տնօրեն Ջոն Փադըֆութը:

Հիշեցնենք, որ UWC Դիլիջան քոլեջում կազմակերպված համերգների շարքի շրջանակում ելույթներով հանդես էին եկել նաև  «Կոլեկտիվ մեծ բազար» խումբը և հայտնի ջազ երաժիշտ Տիգրան Համասյանը: