ԵԽ նախարարների կոմիտեի նախագահը տեղը դրեց ադրբեջանցի պատգամավորին

12:26 • 23.06.15

 


Ստրասբուրգում հունիսի 22-ին մեկնարկեց ԵԽԽՎ ամառային նստաշրջանը, որի ընթացքում, ըստ սահմանված կարգի, ԵԽ Նախարարների կոմիտեի նախագահ, Բոսնիայի ԱԳ նախարար Իգոր Ցրնադակը ելույթ ունեցավ խորհրդաժողովի անդամների առջև և պատասխանեց նրանց հարցերին։


ԵԽԽՎ-ում Ադրբեջանի պատվիրակության անդամ Գանիրա Փաշաևան, իհարկե  հնարավորությունը բաց չթողեց և հարց ուղղեց ՄԻԵԴ-ի կողմից «Չիրագովն» ընդդեմ Հայաստանի» գործով կայացրած վճռի վերաբերյալ։

ԵԽ նախարարների կոմիտեի նախագահ Իգոր Ցրնադակը պատասխանեց, որ բացի ադրբեջանցի պատգամավորի կողմից նշված «Չիրագովն ընդդեմ Հայաստանի» գործից,  ՄԻԵԴ-ը որոշում է կայացրել նաև «Սարգսյանն ընդդեմ Ադրբեջանի» գործով:


Ցրնադակը, նշելով, որ նախարարների կոմիտեն հետևում է վճիռների իրականացման ընթացքին, միաժամանակ ընդգծեց, որ խնդրի կարգավորման միջնորդական առաքելությունն իրականացնում է ԵԱՀԿ Մինսկի խումբը, իսկ Հայաստանն ու Ադրբեջանը ԵԽ-ին անդամակցության պահից համատեղ պարտավորություն են ստանձնել հիմնախնդիրը լուծելու խաղաղ ճանապարհով:


ԵԽ Նախարարների կոմիտեի նախագահի պատասխանը, փաստորեն, հաստատում է, որ անկախ ՄԻԵԴ վերոհիշյալ որոշումից, ղարաբաղյան հիմնախնդրի կարգավորման գործընթացը ընթանում է ԵԱՀԿ Մինսկի խմբի համանախագահության ձևաչափում։