Մեզ աուդիտ պետք չէ, մեզ պետք է լիարժեք չեղարկում. ակտիվիստ
Բաղրամյանում ցույցը շարունակելու կողմնակից երիտասարդներից մեկը քիչ առաջ հայտարարեց, թե իրենց պայքարը շարունակվում է: Նա նշեց, թե ով գնացել է Ազատության հրապարակ, նրանց հաջողություն:
«Գնացողներին մենք ոչ մի պիտակավորում չենք ուզում տալ: Գնացել են, թող իրեն պայքարն այնտեղ շարունակեն, մենք որտեղ սկսել ենք, այնտեղ էլ կավարտենք մեր պայքարը»,- ասաց նա:
Նա նշեց, թե Բաղրամյանում լիդերներ չկան: «Մենք հավաքվել ենք մի խնդրի շուրջ՝ մեր պահանջն է լիարժեք չեղարկում»,- ասաց նա: Սակավաթիվ հավաքվածները վանկարկեցին «չե –ղար-կում»:
Երիտասարդը նաև անդրադարձավ Նախագահ Սերժ Սարգսյանի հայտարարությանը. «Հարգելի Նախագահ, ձեր ասածը ոչ մի հարցի լուծում չէ, մեզ աուդիտ պետք չէ, մեզ պետք է լիարժեք չեղարկում: Մեզ պետք չեն ազգամիջյան բախումներ: Մեր ցույցը, մեր երթը խաղաղ է, ամեն ինչ օրինական է և խաղաղ: Այսօր եթե ոստիկաների հետ բախում տեղի ունենա, ոչ մեկ չի շահի դրանից, մեզ պառակտում պետք չէ»:










