Մեղադրյալ Դադաևը նոր ցուցմունքներ է տվել Բորիս Նեմցովի սպանության գործով. Коммерсантъ

11:58 • 29.06.15

Ռուսաստանի ընդդիմադիր գործիչ Բորիս Նեմցովի սպանության գործով գլխավոր մեղադրյալ Զաուր Դադաևը երկրորդ անգամ է հարցաքննվել Ռուսաստանի քննչական կոմիտեում, հաղորդում է gazeta.ru-ն՝ «КоммерсантЪ»-ին հղումով։

 

Իր ցուցմունքներում նա ներկայացրել է սպանության օրը տեղի ունեցած իրադարձությունների նոր վարկած։ Նրա խոսքով՝ փետրվարի 27-ին ինքը քաղաքի կենտրոնում առհասարակ չի եղել: Պաշտպանության տվյալներով՝ նրա ալիբին կհաստատեն վկաները և նրա բջջային հեռախոսներից ստացված տվյալները:

 

Ինչպես քննությանը բացատրել է ինքը՝ մեղադրյալը, հերթական հանդիպումը տեղի է ունեցել իր նախաձեռնությամբ:

 

Դադաևը նշել է, որ իր առաջին ցուցմունքներում «ստիպված է եղել խոշտանգումների պատճառով այլ բաներ ասել իր և մնացածների մասին», իսկ այժմ ցանկացել է պատմել, թե ինչպես է «ամեն ինչ եղել իրականում»։

 

Հիշեցնենք, որ Նեմցովը սպանվել է փետրվարի վերջին, Մոսկվայի կենտրոնում։