Մոլդովայի կառավարությունը գլխավորել է երկրի ամենահարուստ գործարարներից մեկը

11:03 • 31.07.15

Լուսանկարը՝ totalmedia.md-ի

 

Մոլդովայի խորհրդարանը հավանություն է տվել եվրոպամետ կողմնորոշմամբ կառավարության նոր կազմին ու ծրագրին։

 

Կառավարությունը, որն արդեն երդում է տվել, գլխավորում է Վալերիու Ստրելեցը՝ Լիբերալ-դեմոկրատական կոալիցիոն կուսակցության նախագահի տեղակալը, ով նաև երկրի ամենահարուստ գործարարներից մեկն է, գրում է segodnya.ua-ն։

 

Նոր վարչապետն իր կառավարության առաջնահերթություններից է անվանել կաշառակերության, ինչպես նաև տնտեսական ճգնաժամի դեմ պայքարը։ Նա նաև խոստացել է ամրապնդել հարաբերությունները ԵՄ-ի հետ և գնալ ԵՄ-ին երկրի անդամակցելու ուղիով։

 

Նոր կառավարությունը ձևավորվել է այն բանից հետո, երբ հրաժարական է տվել նախորդ վարչապետ Կիրիլ Գաբուրիչը՝ դիպլոմի կեղծման համար մեղադրանքներից հետո։