Հունաստանում մի շարք չվերթներ չեղյալ են հայտարարվել՝ ավիադիսպետչերների գործադուլի պատճառով
Հույն ավիադիսպետչերները, ովքեր պահանջում են քաղաքացիական ավիացիայի ոլորտում եվրոպական բարեփոխումների իրականացում, չորեքշաբթի օրը գործադուլ են անցկացրել, ինչի հետևանքով չեղյալ են հայտարարվել մի քանի ներքին և միջազգային չվերթներ, գրում է ria.ru-ն:
Չորս ժամ տևած գործադուլի պատճառով Աթենքի միջազգային օդանավակայանում չեղյալ է հայտարարվել 22 չվերթ, ևս 173-ը հետաձգվել է:
Երկրի քաղաքացիական ավիացիայի վարչության ներկայացուցիչները չեն կարող հստակ տվյալներ տրամադրել ողջ երկրում չեղյալ հայտարարված չվերթների թվի վերաբերյալ, սակայն նրանք ուղևորներին տեղեկացրել են հնարավոր ուշացումների և չեղյալ հայտարարվող չվերթների մասին:
Պահանջների չիրականացման դեպքում ավիադիսպետչերները մտադիր են օգոստոսի 14-ից հետո կրկին գործադուլ անել:










