Նորվեգացին բանտից փախել է սերֆինգի տախտակի և խաղալիք բահի օգնությամբ
Նորվեգիայի Բաստոյ կղզու բանտից կալանավորը փախել է սերֆինգի տախտակի և խաղալիք բահի օգնությամբ: Ինչպես տեղեկացնում է The Local-ը` ուղղիչ հաստատության պետ Թոմ Էմբերհարդտի խոսքով` բանտարկյալի փախուստն աշխատակիցները նկատել են օգոստոսի 5-ի առավոտյան:
«Չօգտագործվող իրերի սենյակում հնացած տախտակ ունեինք, որը և խաղալիք բահի հետ միասին գողացել էր կալանավորը», - ասել է բանտապահը:
Ավելի ուշ սերֆինգի տախտակը գտել են ափին: Ինչպես նշում է պարբերականը` 23-ամյա տղամարդը, ով դատապարտվել էր թմրանյութերի վաճառքի և բռնաբարության համար, բահն օգտագործել էր որպես թի, որով թիավարել է 3 կմ, որպեսզի կղզուց հասնի ցամաքային տարածք:
Ուղղիչ հաստատությունում, որտեղ նորվեգացին կրում էր պատիժը, բանտախցերի դռները չեն փակվում, իսկ պատուհանների վրա վանդակաճաղեր չկան: Կալանավորների օրակարգի մաս է կազմում ձիարշավը, թենիսը և դահուկասահքը:










