ԱՄՆ-ն ԻՊ-ի սպանված առաջնորդի կնոջը փոխանցել է Իրաքի իշխանություններին. Պենտագոն
ԱՄՆ-ն Իրաքի իշխանություններին է փոխանցել ամերիկյան հատուկ ջոկատի գործողության ընթացքում սպանված «Իսլամական պետություն» ծայրահեղական խմբավորման ղեկավարներից Աբու աս-Սայաֆի կնոջը: Այդ մասին ասված է հինգշաբթի օրը Պենտագոնի տարածած հաղորդագրության մեջ, գրում է ТАСС-ը:
«Իրաքում մայիսի 15-ին ամերիկյան զինծառայողների կողմից ձերբակալված Նաշրին Ասադ Իբրահիմը, ով հայտնի է նաև որպես Ում աս-Սայաֆ, այսօր ավելի վաղ փոխանցվել է Բաղդադին»,- նշված է հայտարարության մեջ:
Պենտագոնում ընդգծել են, որ ներկայում աս-Սայաֆը գտնվում է Իրաքի Քուրդիստանում՝ հսկողության տակ: Պենտագոնում գրոհայինի կնոջ փոխանցումն «իրավաչափ» են անվանել՝ ելնելով «օրենքի, դիվանագիտության, հետախուզության, անվտանգության նկատառումներից»։
Մայիսի կեսին Իրաքում գտնվող ԱՄՆ հատուկ ջոկատը հատուկ գործողություն է իրականացրել Սիրիայի արևելքում, ինչի արդյունքում ոչնչացվել է Աբու աս-Սայաֆը:
Ինչպես հայտնել է Սպիտակ տան ազգային անվտանգության խորհրդի պաշտոնական ներկայացուցիչ Բերնադետ Միհենը, «ԱՄՆ կառավարությունը չի համակարգել գործողությունները սիրիական ռեժիմի հետ և չի տեղեկացրել նախապես սպասվող գործողության մասին»:
Ի սկզբանե նախատեսվում էր ահաբեկչին կենդանի վերցնել, բայց նա սպանվել է գործողության ժամանակ, քանի որ զինված դիմադրություն է ցույց տվել:










