Կոլորադոյում լեռնագնացները վտանգում են իրենց կյանքը՝ ցատկելով «Հավատի ցատկ» լեռնանցքի վրայով (լուսանկարներ, տեսանյութ)
Այս տեսանյութը ցույց է տալիս, թե ինչպես են երկու լեռնագնացներ վտանգում իրենց կյանքը և ցատկում Կոլորադոյում բազմաթիվ կյանքեր խլած, ավելի քան 4 հազար մետր բարձրություն ունեցող Մարուն Բելզ գագաթի վրա գտնվող լեռնանցքի վրայով, գրում է The Daily Mail-ը։
«Հավատի ցատկը» բաժանում է Մարուն գագաթը Հյուսիսային Մարուն գագաթից և ամուր նյարդեր է պահանջում անցնելու համար, քանի որ երկու կողմից էլ քարերը շարժվում են և հեշտությամբ ընկնում, իսկ լեռը չափազանց ուղղաձիգ է այդ հատվածում:
Տեսանյութում երևում է, թե ինչպես է մագլցողներից մեկը ցատկում լեռնանցքի վրայով և շրջվում, որպեսզի հորդորի իր ընկերոջը հետևել իրեն։ Այնուամենայնիվ, տեսանյութում երևում է, թե ինչպես է նրա ցատկից հետո մի քանի քար գլորվում լեռան վրայով և վտանգի ենթարկում նրա ընկերոջ կյանքը։
















