Մեծ Բրիտանիայում անօրինական աշխատողներին պատրաստվում են բանտ նստեցնել
Մեծ Բրիտանիայի կառավարությունն առաջարկում է մինչև վեց ամիս ազատազրկման ժամկետով պատժել նրանց, ովքեր երկրում աշխատում են առանց անհրաժեշտ փաստաթղթերի, գրում է BBC-ի ռուսական ծառայությունը։
Ներգաղթի մասին օրենքի նախագծում, որը պետք է դրվի բրիտանական խորհրդարանի քննարկմանը, ներառված են նաև անօրինական ներգաղթյալների աշխատանքի ընդունող ռեստորանների և խանութների դեմ պայքարի միջոցներ: Այդ ձեռնարկությունները կզրկվեն արտոնագրերից, եթե պարզվի, որ իրենց աշխատակիցները չունեն աշխատանքի թույլտվություն:
Որպես պատժի այլընտրանքային տարբերակ՝ նախատեսված է տուգանք և աշխատավարձի առգրավում։
Ներգաղթի հարցերով փոխնախարար Ջեյմս Բրոքենշիրը հայտարարել է, որ իշխանությունները կշարունակեն պայքարել համակարգի չարաշահման դեմ։
Օրենքի նախագծի հեղինակները ցանկանում են այնպես անել, որ օրենքի տակ հայտնվեն նաև տաքսու վարորդները և օպերատորները։










