Նոր Սահմանադրությունը ծառայելու է բոլորի շահերին և պետք է համաժողովրդական համաձայնություն ստանա. Արտակ Զաքարյան

13:19 • 26.08.15


ԱԺ «Հանրապետական» խմբակցության պատգամավոր Արտակ Զաքարյանը այսօր լրագրողների հետ հանդիպմանն ասաց, որ քաղաքական կուսակցությունների ու հասարակական կազմակերպությունների մոտեցումներն ու հավաքական ձևակերպումները կարևոր են, որպեսզի ունենանք լիարժեք, հնարավորինս լայն համաձայնություն վայելող փաստաթուղթ:
 

Ըստ նրա, բովանդակային քննարկումների փուլն սկսվել է, որն ավելի ընդլայնված ձևաչափերով կլինեն: Զաքարյանը նշեց, որ առաջիկայում կլինեն խորհրդարանական լսումներ, որտեղ ևս հանրության ակտիվ շահերը ներկայացնող կազմակերպություններն իրենց դիրքորոշումները կներկայացնեն: 
 

«Ժողովրդավարությունն անընդհատ պահանջում է խնամք, և որևէ մի երկիր չի կարող ասել, որ հասել է լիարժեք ժողովրդավարության, հետևաբար, իրավական, քաղաքական համակարգի հավասարակշռված կիրառումը պետական և հանրային կյանքում շատ կարևոր է, որ խոսենք ժողովրդավարական ինստիտուտների մասին»,-ասաց նա և հավելեց, որ համաժողովրդական համաձայնության արդյունքով պետք է ընդունվի նոր Սահմանադրությունը, որը վստահաբար ծառայելու է բոլորի շահերին:
 

Հարցին, թե Հայաստանը լինելով ԵՏՄ անդամ, ինչու է ավելի շատ ուշադրություն սևեռում  Վենետիկի հանձնաժողովի կարծիքին, և արդյոք կարծիք հարցրել են նույն բարեփոխումների հարցով Ռուսաստանից կամ Ղազախստանից, Արտակ Զաքարյանը նշեց, որ նախ իրենց առաջին հերթին հետաքրքրում է ՀՀ քաղաքացիների և քաղաքական կազմակերպությունների կարծիքը:

«Համաժողովրդական համաձայնության արդյունքով պետք է լինի: Իսկ Վենետիկի հանձնաժողովն ընդունված ավանդույթի համաձայն՝ մասնագիտական հեղինակավոր կազմակերպություն է, որի առաքելությունն է խորհրդատվական գնահատականներ տալը: Հետևաբար, գերակայություն ունեցող օրենքները, Վենետիկի հանձնաժողովի նախաձեռնությամբ ստանում են համապատասխան գնահատականը: Մեր գործընկերները ԵՏՄ-ի կարող են ունենալ իրենց քաղաքական ու դիրքորոշումները, բայց մասնագիտական առումով ավելի նպատակահարմար է ունենալ երկար տարիներ այդ առաքելությունն իրականացնող կազմակերպությունների կարծիքը»,-ասաց նա:
 

Արտակ Զաքարյանը, անդրադառնալով սահմանադրական բարեփոխումների դեմ տեսակետներին, ասաց, որ թե՛ «այո»–ն, թե՛ «ոչ»-ը ինքնանպատակ լինել չի կարող: «Սա մի գործընթաց է, որ ամեն տարի չես իրականացնի, և այն է, որ առավելագույնս լավ մշակված վերջնական արդյունք լինի և համաժողովրդական համաձայնություն ստանա: Ե՛վ «ոչ»-ի տանիքի տակ, և՛ «այո»-ի պետք  է լինեն հիմնավորումներ»,-ասաց նա։

 

Պատգամավորն ընդգծեց, որ գնալով «ոչ»-ը դառնում է անէական: «Որովհետև անհրաժեշտություն է սահմանադրական բարեփոխումները, կյանքը թելադրում է իր պայմանները և պետք է կարողանանք բավարարել այդ պահանջները: Առողջ հիմնավորումներով ոչ ասողներին, մենք բնականաբար շատ ուշադիր լսում ենք, նրանից որոշների հիմնավորումներ հաշվի են առնված»,- ասաց նա և նշեց, որ կան նաև հայտարարություններ, որտեղ քաղաքական հիմնավորումներ չկան և արտահայտվում են զուտ որպես «կապրիզ»: