Մոսկվան և Անկարան համաշխարհային և տարածաշրջանային մարտահրավերների դեմ պայքարում համագործակցության ամրապնդման անհրաժեշտություն են տեսնում։ Այդ մասին ասված է ՌԴ ԱԳՆ մամուլի բաժնի մեկնաբանությունում, հաղորդում է РИА Новости-ն։

Ստամբուլում նոյեմբերի 25-ին ՌԴ-ի և Թուրքիայի արտգործնախարարներ Սերգեյ Լավրովի և Ֆերիդուն Սինիրլիօղլուի նախագահությամբ կանցնի Ռուսաստանի և Թուրքիայի նախագահների ղեկավարած Բարձր մակարդակի համագործակցության խորհրդի շրջանակներում գործող Ռազմավարական պլանավորման համատեղ խմբի 5-րդ նիստը։

«Կարծիքների փոխանակություն կիրականացվի արդի երկկողմ, տարածաշրջանային և միջազգային խնդիրների վերաբերյալ: Նախարարները կքննարկեն իրավիճակը Սիրիայում, ընդհանուր առմամբ Մերձավոր Արևելքում և Հյուսիսային Աֆրիկայում։ Ուշադրության կենտրոնում ահաբեկչության դեմ պայքարի արդյունավետության բարձրացումն է։ Կշարունակվի Ուկրաինայում, Անդրկովկասում և Կենտրոնական Ասիայում դրության հետ կապված հարցերի վերաբերյալ երկխոսությունը՝ միջազգային կազմակերպություններում համագործակցությամբ»,- հայտնել են գերատեսչությունից։

ՌԴ ԱԳՆ-ում նշել են, որ Ռուսաստանը և Թուրքիան նման և համընկնող մոտեցումներ ունեն շատ համաշխարհային և տարածաշրջանային խնդիրների շուրջ և մտադիր են շարունակել կառուցողական երկխոսությունը։