Բրյուսելի ամայացած փողոցներում երաժիշտը նվագում է Hallelujah երգը՝ սփոփելով բնակիչներին (տեսանյութ, լուսանկարներ)

Բրիտանական The Daily Mail պարբերականի կայքը հրապարակել է տեսանյութ, որում թավջութակահարը նվագում է Լեոնարդ Քոենի Hallelujah երգը վախով «պատված» Բրյուսելի փողոցներում։

Բելգիայի մայրաքաղաքում այժմ արտակարգ դրություն է սահմանված. ոստիկանությունն ահաբեկչական սպառնալիքի պատճառով հատուկ գործողություններ է իրականացնում Բրյուսելում։

Ոստիկանությունը նաև կոչ է արել քաղաքի բնակիչներին լռություն պահպանել սոցիալական ցանցերում և չհայտնել գործողության մասին տեղեկատվություն:

Ինչպես գրում է բրիտանական թերթը, այս տեսանյութը, որը նկարահանվել է քաղաքի կենտրոնում, ցույց է տալիս, թե ինչպես է երաժիշտն իր երաժշտությամբ փորձում մխիթարել անցնող մարդկանց։

Տեսանյութը Twitter-ում տեղադրել է Էլս Ամպե անունով օգտատերը, ով գրել է. «Սյուրռեալ զգացողություն է։ Սա իմ քաղաքն էր երեկ: Իսկ այսօր Բրյուսելն է՛լ ավելի անիրական է»։

Չնայած Բելգիայում արտակարգ իրավիճակին՝ տեսանյութը ցույց է տալիս, որ մարդկանց մի մասը շարունակում է զբաղվել իր ամենօրյա գործերով։

Հիշեցնենք, որ Բրյուսելում շարունակվում են գործողությունները՝ կապված քաղաքի վրա իսլամիստ գրոհայինների հարձակման վտանգի հետ: Ոստիկանությունը խնդրել է ԶԼՄ-ներին չհայտնել նման գործողությունների մանրամասները, իսկ տեղի բնակիչներին՝ չգրել սոցցանցերում ոստիկանության ակտիվության վայրերի մասին:

Բելգիայի վարչապետ Շառլ Միշելի խոսքով՝ լուրջ մտավախություններ կան, որ Փարիզի նման ահաբեկչություններ կարող են իրականացվել նաև Բելգիայի մայրաքաղաքում: Ոստիկանությունը որոնում է մարդկանց, որոնց բելգիական հատուկ ծառայությունները կասկածում են նոր հարձակումների պատրաստման համար։