Ահաբեկիչների գրոհած «Բատակլանում» ելույթ ունեցած ռոքերները ցանկանում են նորից համերգ տալ Փարիզում

Ամերիկյան Eagles of Death Metal ռոք խմբի անդամները ցանկություն են հայտնել ևս մեկ անգամ ելույթ ունենալ փարիզյան տխրահռչական «Բատակլան» համերգասրահում, որտեղ նոյեմբերի 13-ին կազմակերպված համերգի ժամանակ իսլամիստ ահաբեկիչները սպանել էին 89 մարդու:

Ինչպես նշում է ria.ru-ն, կալիֆոռնիական ռոք խումբը վստահեցրել է, որ «Բատակլանի» վերաբացումից հետո մտադիր է նույն սրահում նորից ելույթ ունենալ:

«Չեմ համբերում, թե երբ եմ նորից վերադառնալու Փարիզ ու նվագելու այնտեղ: Ուզում եմ, որ մեր խումբն առաջինը ելույթ ունենա «Բատակլանում»` դրա վերաբացումից հետո: Մեր ընկերները եկել էին այնտեղ ռոքնռոլ լսելու, բայց փոխարենը` մահացան: Ես ուզում եմ վերադառնալ այնտեղ ու ապրել»,-նշել է խմբի մեներգիչ Ջեսի Հյուզը` Vice-ին տված հարցազրույցում:

Աղբյուրը մանրամասնում է, որ իսլամիստենրի հարձակման հետևանքով 89 զոհերի թվում է նաև խմբի մենեջեր Նիք Ալեքսանդերը: Նշենք, որ զոհերի թվում է նաև մեր հայրենակցուհին՝ Լոլա Ուզունյանը։