Ռուսաստանը հրաժարվել է Թուրքիայի հետ համատեղ զորավարժություններից

Ռուսաստանը թուրքական օդուժի կողմից խփված Սու-24 կործանիչի հետ կապված միջադեպի պատճառով անորոշ ժամանակով դադարեցրել է մասնակցությունը BLACKSEAFOR օպերատիվ փոխգործակցության սևծովյան ռազմածովային խմբի վարժանքներին։

Այդ մասին հաղորդել է Պետդումայի պաշտպանության հանձնաժողովի ղեկավար Վլադիմիր Կոմոեդովը, որն ավելի վաղ ղեկավարել է Սևծովյան նավատորմը:

Թուրքիայից, Կոմոեդովի խոսքով, հետ է կանչվել ռուսական ռազմածովային նավատորմի ներկայացուցիչը, որը զբաղվում էր թուրքական ռազմածովային նավատորմի ու Սևծովյան նավատորմի գործողությունների համակարգմամբ։

«Համաձայն ՌԴ պաշտպանության նախարարության որոշման՝ ՌԴ-ն դադարեցրել է ռազմական գծով շփումը Թուրքիայի հետ՝ դադարեցնելով Սևծովյան նավատորմի մասնակցությունը BLACKSEAFOR-ի զորավարժություններին»,-ասել է Կոմոեդովը:

Ռուսաստանը Թուրքիայի նախաձեռնությամբ ստեղծված Օպերատիվ փոխգործակցության սևծովյան ռազմածովային խմբի աշխատանքներին մասնակցում է 2001 թվականից։ Բացի ՌԴ-ից և Թուրքիայից՝  BLACKSEAFOR-ի խմբում ներառված են Բուլղարիան, Ռումինիան, Ուկրաինան և Վրաստանը: