Վուդի Ալենը նշում է 80-ամյա հոբելյանը (լուսանկարներ)

Այսօր իր 80-ամյակն է նշում հայտնի ռեժիսոր Վուդի Ալենը։

Հեյվուդ (Վուդի) Ալենը ծնվել է 1935թ. դեկտեմբերի 1-ին Նյու Յորքում: Նրա մայրն աշխատել է որպես հաշվապահ, իսկ հայրը` ոսկերիչ և մատուցող։ Դպրոցն ավարտելուց հետո նա ընդունվել է Նյու Յորքի համալսարան, որտեղ ուսումնասիրել է հաղորդակցություն և կինեմատոգրաֆ, սակայն հեռացվել է: Այնուհետև ընդունվել է Նյու Յորքի քաղաքային քոլեջ, սակայն այստեղ նույնպես չի ավարտել ուսումը: Հետագայում զբաղվել է ինքնակրթությամբ, գրում է ՏԱՍՍ գործակալությունը:

Վուդի Ալենը սկսել է հումորային տեքստեր գրել 15 տարեկանում և ուղարկել դրանք հայտնի գրողներին` վաճառելու նպատակով: 19 տարեկանում նրան սցենարիստի աշխատանք են առաջարկել NBC հեռուստաընկերությունում, գրել է տեքստեր հայտնի հումորային հաղորդումների և սերիալների համար:

Առավել մեծ հաջողություն են ունեցել Ալենի «Էնի Հոլ»,  «Մանհեթեն», «Ինտերիերներ» ֆիլմերը։ Ընդհանուր առմամբ, ռեժիսորը նկարահանել է մոտ 50 գեղարվեստական ֆիլմ, այդ թվում`  «Հիշողություններ «Աստղային փոշու մասին»»,  «Զելիգ»,  «Դենի Ռոուզի բրոդվեյը»,  «Հաննան և նրա քույրերը»,  «Ամուսիններ», «Ժասմին»: Իր շատ ֆիլմերում ռեժիսորը կատարել է գլխավոր կամ երկրորդական դերեր:

Նա 4 «Օսկար» մրցանակի դափնեկիր է։ Արժանացել է նաև բազում այլ կինոմրցանակների, այդ թվում՝ «Ոսկե գլոբուս», BAFTA և այլն:
 

Այժմ Վուդի Ալենն աշխատում է իր նոր ֆիլմի և իր կարիերայում առաջին հեռուստասերիալի վրա: