Եմենի մայրաքաղաքում առևանգել են Կարմիր խաչի աշխատակցուհուն
Եմենի մայրաքաղաք Սանայում անհայտ անձինք առևանգել են Կարմիր խաչի միջազգային կոմիտեի աշխատակցուհուն: РИА Новости-ի փոխանցմամբ` այս մասին հայտնել է կազմակերպության ներկայացուցիչ Ռիմա Քամալը:
Ինչպես հաղորդվում է` առևանգված աշխատակցուհին Թունիսի քաղաքացի է: Առևանգողների պահանջների մասին ոչինչ հայտնի չէ:
Քամալն ընդգծել է, որ կազմակերպության անձնակազմի շարժը քաղաքում սահմանափակվել է մինչև հանգամանքների պարզաբանումը:
Եմենում շարունակվում է զինված հակամարտությունը ապստամբ-հուսիթների և բանակի` նախկին նախագահ Ալի Աբդալա Սալեհին աջակցող հատվածի միջև:










