Ֆրանսիական հեղինակավոր «Սեզար» կինոմրցանակին է արժանացել «Ֆաթիմա» ֆիլմը (լուսանկարներ)

Ռեժիսոր Ֆիլիպ Ֆոկոնի «Ֆաթիմա» ֆիլմը, որը պատմում է Մաղրիբի երկրների բնակիչների մասին, լավագույնն է ճանաչվել ֆրանսիական հեղինակավոր «Սեզար» կինոմրցանակի հանձնման արարողության ժամանակ, փոխանցում է РИА Новости-ն:

Ռեժիսոր Առնո Դեպլեշենը, ով նկարահանել է «Իմ պատանեկության 3 հիշողությունները» ֆիլմը, դարձել է լավագույն ռեժիսոր:

Լավագույն արտասահմանյան ֆիլմ է ժյուրին ընտրել «Բըրդման» ֆիլմը, որը նկարահանել է մեքսիկացի ռեժիսոր Ալեխանդրո Գոնսալես Ինյարիտուն:

Ինչպես և ենթադրում էին կինոքննադատները՝ լավագույն դերասանուհի է ճանաչվել Կատրին Ֆրոն, ով նկարահանվել է Քսավյե Ջանոլիի «Մարգարիտ» ֆիլմում:

«Երկրորդ պլանի լավագույն դերասանուհի» անվանակարգում հաղթող է ճանաչվել Սիդսե Բաբեթ Քնուդսենը` Քրիստիան Վենսանի ֆիլմում կատարած դերի համար:

Լավագույն դերասան մրցանակին է արժանացել Վենսան Լինդոնը` Ստեֆան Բրիզեի «Շուկայի օրենքը» ֆիլմում կատարած դերի համար:

«Պատվավոր Սեզար» անվանակարգում մրցանակն արդեն 2-րդ անգամ բաժին է հասել 71-ամյա դերասան Մայքլ Դուգլասին։