ԱՄՆ Բալտիմոր քաղաքում անհայտ անձը կրակ է բացել ցուցարարների ուղղությամբ
Անհայտ հանցագործը կրակ է բացել ԱՄՆ Բալտիմոր քաղաքում ընթացող ցույցի ժամանակ, որը եղել է ընդդեմ փողոցային բռնության: Միջադեպի հետևանքով տուժել է առնվազն 4 կին և մեկ տղամարդ, հայտնել է քաղաքի ոստիկանության վարչությունը:
Համաձայն տեղեկությունների` խոսքը կյանքին սպառնալիք չներկայացնող վնասվածքների մասին է:
Ցույցին մասնակցել է մոտ 20-30 մարդ, նշել են Բալտիմորի իրավապահները: Քաղաքը գտնվում է ԱՄՆ-ի մայրաքաղաքից մոտ 1 ժամ հեռավորության վրա:
«Ո՛չ դրդապատճառները, ո՛չ կասկածյալները դեռ պարզված չեն»,- հայտնել են ոստիկանությունում:
Ցույցը կայացել է Բալտիմորում 24-ամյա սևամորթ բնակչի սպանությունից հետո: Այն կազմակերպել էին սպանվածի հարազատները և մտերիմները, փոխանցում է ՏԱՍՍ գործակալությունը:










