Հռոմի պապը դատապարտել է Քաբուլում և Մյունխենում տեղի ունեցած ահաբեկչությունները

15:54 • 25.07.16

Հռոմի պապ Ֆրանցիսկոսը դատապարտել է անցած մի քանի օրվա ընթացքում  բավարական Մյունխենում և Աֆղանստանի մայրաքաղաք Քաբուլում տեղի ունեցած ահաբեկչական հարձակումները, որոնք խլել են  տասնյակ մարդկային կյանքեր:

 

Ինչպես հայտնում է The New York Daily News-ը, դիմելով կիրակի օրը Սուրբ Պետրոսի  հրապարակում հավաքված հավատացյալներին` կաթոլիկների հովվապետը կոչ է արել միանալ աշխարհում խաղաղության հաստատման համար ուղղված իր աղոթքներին:

 

«Դժվարությունները մթագնում են խաղաղության և ապահովության հեռանկարները, բայցևայնպես մեր աղոթքները չպետք է դադարեն. հակառակը` դրանք պետք է ավելի հաստատաուն դառնան »,-ասել պոնտիֆիկոսը:

Հիշեցնենք, որ ուրբաթ Մյունխենում 18-ամյա իրանցի երիտասարդը զանգվածային հրաձգություն է իրականացրել` խլելով 9 մարդու կյանք: Իսկ հաջորդ օրը Քաբուլում  խաղաղ ցույցի ժամանակ մահապարտը գործի է դրել իրեն ամրացված պայթուցիկն ու սպանել առնվազն 80 հոգու: