«Սասնա ծռերի» 26-ամյա անդամի կյանքին դեռ վտանգ է սպառնում. Բժիշկ (տեսանյութ)
Հուլիսի 17-ին ոստիկանության ՊՊԾ գնդի գրավման արդյունքում վիրավորված «Սասնա ծռեր» ջոկատի անդամ, 26-ամյա Թաթուլ Թամրազյանի առողջական վիճակը շարունակում է մնալ ծանր կայուն, նրա կյանքին դեռ վտանգ է սպառնում:
Այս մասին այսօր լրագրողների հետ զրույցում ասաց «Էրեբունի» հիվանդանոցի ինտենսիվ թերապիայի գիտական ղեկավար Հարություն Մանդոյանը:
26-ամյա Թաթուլ Թամրազյանը դեռ վերակենդանացման բաժանմունքում է: Նա ՊՊԾ գնդի տարածքից հիվանդանոց էր տեղափոխվել ներքին արյունահոսությամբ ու ծանր վիճակում՝ կյանքին սպառնացող վտանգով: Նա ստացել է որովայնի ձախ կեսի հրազենային վիրավորում և մի շարք վիրահատությունների ենթարկվել, հեռացվել է նրա ձախ երիկամը, հաստաղու մի հատվածը:
Բժիշկը նաև ասաց, որ Թաթուլ Թամրազյանի գիտակցությունը տեղում է, նա խոսում է:










