ՄԱԿ-ի գլխավոր քարտուղարը կոչ է արել Ռուսաստանին և ԱՄՆ-ին հնարավորինս արագ հասնել Հալեպում հրադադարի

10:58 • 17.08.16

ՄԱԿ-ի գլխավոր քարտուղար Բան Կի Մունը երեքշաբթի նախազգուշացրել է Հալեպում մարդասիրական աղետի սպառնալիքի մասին և կոչ է արել Ռուսաստանին և ԱՄՆ-ին ամենակարճ ժամկետներում հասնել սիրիական քաղաքում և երկրի այլ հատվածներում հրադադարի մասին համաձայնության:

 

Այդ մասին հայտնում է Reuters գործակալությունը՝ վկայակոչելով համաշխարհային կազմակերպության Անվտանգության խորհրդին ուղղված գլխավոր քարտուղարի զեկույցը:

 

«Հալեպի դեպքում մենք կարող ենք բախվել մարդասիրական աղետի, որն աննախադեպ կլինի սիրիական հակամարտությունը բնորոշող արյունահեղության և տանջանքների հինգ տարիների համար»,- գրել է Բան Կի Մունը:

 

Նրա խոսքով՝ հակամարտության բոլոր կողմերը խախտում են միջազգային մարդասիրական իրավունքը, անընտրողաբար հարձակումներ են գործում բնակելի թաղամասերի վրա:

 

Գլխավոր քարտուղարը հերթական անգամ կոչ է արել Հալեպում ընթացող ռազմական գործողություններում ամենշաբաթյա 48-ժամյա դադար սահմանել, որը թույլ կտա օգնություն հասցնել բնակչությանը, ինչպես նաև «կոչ է արել Մոսկվային և Վաշինգտոնին շուտափույթ համաձայնություն ձեռք բերել հրադադարի հարցով»:

 

Բան Կի Մունի ամենամսյա զեկույցը ՄԱԿ-ի Անվտանգության խորհրդի նիստում քննարկվելու է օգոստոսի 22-ին: