Բելգիայում բնակվող թուրքերը սպառնալիքների պատճառով երեխաներին հանում են գյուլենականների կողմից ֆինանսավորվող դպրոցներից
Բելգիայում էթնիկ թուրքերն իրենց հասցեին ուղղված սպառնալիքների պատճառով ստիպված են երեխաներին հանել ընդդիմադիր քարոզիչ Ֆեթուլլահ Գյուլենին մոտ կազմակերպությունների կողմից ֆինանսավորվող դպրոցներից, հայտնում է Belga գործակալությունը:
«Սպառնալիքի տակ են հայտնվել ծնողները, որոնց երեխաները սովորում են Ֆլանդրիայի և Բրյուսելի շրջանի տարրական և միջին դպրոցներում: Անդերլեխտի «Լյուցերն» քոլեջի տնօրենի կարծիքով՝ դրա հետևում կանգնած են նախագահ Ռեջեփ Թայիփ Էրդողանին աջակցող կազմակերպությունները»,- գրում է գործակալությունը:
Հիշեցնենք, որ հուլիսի 15-ին Թուրքիայում տեղի է ունեցել ռազմական հեղաշրջման փորձ: Դրան հաջորդել են ձերբակալությունները երկրի զինված ուժերում և այլ կառույցներում, փակվել են բազմաթիվ թերթեր, կազմակերպություններ, կենտրոններ, երկրում հայտարարվել է արտակարգ դրություն: Հեղաշրջման փորձի համար Թուրքիայի նախագահ Ռեջեփ Թայիփ Էրդողանը մեղադրում է «Հիզմեթ» («Ծառայություն») կրոնական շարժման հիմնադիր և իր հակառակորդ Ֆեթուլլահ Գյուլենին, ով ներկայումս բնակվում է ԱՄՆ Փենսիլվանիա նահանգում:










