Վանում տեղի ունեցած պայթյունը սարսափեցրել է հարսանիքի հյուրերին (լուսանկարներ, տեսանյութ)
Բրիտանական The Daily Mail-ը հրապարակել է տեսանյութ, որում երևում է, թե ինչպես են Թուրքիայում` Վան քաղաքում (մինչև 1915թ․՝ հայկական), հարսանիքի հյուրերը սարսափահար այսուայն կողմ վազում և փորձում անվտանգ տեղ գտնել՝ մոտակայքում ականապատ մեքենայի պայթյունից հետո։
Տեսանյութում մասնավորապես երևում է, թե ինչպես են խնջույքի հյուրերն իրար ձեռք բռնած ուրախ պարում, երբ հանկարծ դրսում պայթյուն է հնչում: Այնուհետև խուճապ է սկսվում, և մեծահասակները սկսում են երեխաներին սրահից դուրս հանել:
Հիշեցնենք, որ Վան քաղաքում ոստիկանական բաժանմունքի մոտ ականապատ ավտոմեքենա է պայթեցվել, ինչի հետևանքով 3 մարդ է զոհվել։ Պաշտոնյաների հաղորդմամբ՝ վիրավորվել է առնվազն 73 մարդ՝ 53 քաղաքացի և 20 ոստիկան:
Իշխանությունները չորեքշաբթի օրվա հարձակման համար մեղադրել են Քրդական աշխատավորական կուսակցությանը, որը մեքենաների պայթեցման արշավ է սկսել, որոնց թիրախում են ոստիկանական բաժանմունքները: Ժամեր անց մեկ այլ մեքենա է պայթել Էլազիգ քաղաքում ոստիկանական բաժանմունքի մոտ, որի հետևանքով սպանվել է առնվազն երեք ոստիկան և վիրավորվել է 146 մարդ:
















