Ալյասկայի գյուղերից մեկը կտեղափոխվի, քանի որ կարող է անհետանալ՝ գլոբալ տաքացման պատճառով

Ալյասկայի Շիշմարեֆ գյուղի բնակիչները փակ քվեարկությամբ որոշել են վերաբնակեցնել ողջ գյուղը, որի բնակչությունը կազմում է 650 մարդ:

Ինչպես հայտնում է Business Insider-ը` գյուղի բնակչությունը, որը հիմնականում բաղկացած է Ինուպիատ ցեղախմբի ներկայացուցիչներից, կտեղափոխվի կղզու մայրցամաքային հատված:

Ըստ CNN-ի տվյալների` գյուղի բնակիչներից 89-ը քվեարկել է տեղափոխվելու, 78-ը` իրենց հայրենի առափնյա շրջանում մնալու և այն փրկելու օգտին: Գյուղի բնակիչներն այդտեղ իրենց պատմությունն ու մշակույթը հիմնադրել են 500 տարի առաջ:

Կղզու ափամերձ շրջանը 30 մետր երկարությամբ տարածք է կորցրել ծովի ջրի մակարդակի բարձրացման պատճառով, ինչի արդյունքում որոշ ընտանիքներ մոտ 13 անգամ տեղափոխվել են: Ըստ տեղի բնակիչների` երկու տասնամյակից կղզին ամբողջությամբ կանհետանա: